Lotha Baptist Church Dimapur shijo Dimapur yantsü longjüng lo tssokacho. Meta yingsüng kvülo tssokachi licho sana shijo ekhumkholo ovung eliden jiang na liko ji shi khi tssokachicho. Ekhümkho shijo November 29th 1957 lo soyingcho osi Lotha Baptist Churches Association lo shenkai vanala. Ekhumkho shilo baptithang ovo vancho othang mongo aria vana.
Ete lotha eramoe den ha, ejomae na jo makhani na Dimapur shilo oyi vantacho tssokhuka, ntiotssole Japan ritso n-chiyithüng vüngi na Dimapur hakono oyi vanta erow ji motsu khosha lira. Hoji yakchia enhünga Kukidolong yan shilo ha Baptist echüngi na ete Lotha yan tssothuki, hoji lo elio yan jijo Khümkiri yan to tsaa e picho. Toleha ete kyong ovung eli jiang na hungjan-rüjan matarocho yakchia, süngjungi n-vam rotao ji tsükona jipopoe na ekyungo metapvui kumkhani sicho.
Opvu tssoa ovüng eli ete kyong jiang na kyutao jijo, meta shi nkolo jo liyora nochonori na pyingcho meta tssow ji yakchia kyutasi n-vanchüngvu sikita rotacho. Toleha 1942, lo satsüron elhi etsoe eramo Rhanlamo Lotha, Okotsoe jina Assam Police Sub-inspector tssoathüng meta shi lo satsüron na yithukcho. Osi hoji nzyu, November 26 lo, Eramo. Sanchisao Riphyim, Eramo. Nyamo Longsa, Eramo. Konchio Wokha, Eramo. Mmhonchumo Longsa to shiang na oyi nzo tssoe vanta rocho. Elani hoji nzyu na benkai eramoe shiang na oyi ekhyimphai vanta rocho:
Shiang na oyi vanchüng sanati, echümchum na jo, ete Lotha oyan lona oyi vanta yicho. Ete Lotha ovüng eli jiang naha, onte ejan liko jo m-mataro na nkoe vata rotacho, tolia meta shi ochyu-ovüng jo hetata tssentsüman küma yiv to hungjan matarow ji yakchia, meta mmhomo jiang jo, ela tsseni na jipopoe thüngi ekyungo yenkhani sitasi, ete kyon sulami eyi ekyungo jo, oyam nken-tssai shita yicho. 1950 lona benkae ete kyon na nzyualo, nzyualo to ovo rankata yicho, osi sülami jo Naga jipo thanpoe jiang nzo tssoe Duncan yan tona Notun yan to tssoe vanta yicho.