Ete lotha eramoe den ha, ejomae na jo makhani na Dimapur shilo oyi vantacho tssokhuka, ntiotssole Japan ritso n-chiyithüng vüngi na Dimapur hakono oyi vanta erow ji motsu khosha lira. Hoji yakchia enhünga Kukidolong yan shilo ha Baptist echüngi na ete Lotha yan tssothuki, hoji lo elio yan jijo Khümkiri yan to tsaa e picho. Toleha ete kyong ovung eli jiang na hungjan-rüjan matarocho yakchia, süngjungi n-vam rotao ji tsükona jipopoe na ekyungo metapvui kumkhani sicho.
Opvu tssoa ovüng eli ete kyong jiang na kyutao jijo, meta shi nkolo jo liyora nochonori na pyingcho meta tssow ji yakchia kyutasi n-vanchüngvu sinkita rotacho. Toleha 1942, lo satsüron elhi etsoe eramo Rhanlamo Lotha, Okotsoe jina Assam Police Sub-inspector tssoathüng meta shi lo satsüron na yithukcho. Osi hoji nzyu, November 26 lo, Eramo. Sanchisao Riphyim, Eramo. Nyamo Longsa, Eramo. Konchio Wokha, Eramo. Mmhonchumo Longsa to shiang na oyi nzo tssoe vanta rocho. Elani hoji nzyu na benkai eramoe shiang na oyi ekhyimphai vanta rocho:
Eramo Ngangshio – Wokha
Eramo Pisamo – Wokha
Eramo Tanphio – Phiro
Eramo Merithung – Yamhon
Eramo Manchio – Longsa
Eramo Chilow – Changsu
Eramo Ekyimo – Riphyim
Eramo Rasow – Riphyim
Eramo Zanthungo – Changsu
Eramo Zanthungo – Longsa
Eramo Nyimlamo – Yikhum
Shiang na oyi vanchüng sanati, echümchum na jo, ete Lotha oyan lona oyi vanta yicho. Ete Lotha ovüng eli jiang naha, onte ejan liko jo m-mataro na nkoe vata rotacho, tolia meta shi ochyu-ovüng jo hetata tssentsüman küma yiv to hungjan matarow ji yakchia, meta mmhomo jiang jo, ela tsseni na jipopoe thüngi ekyungo yenkhani sitasi, ete kyon sulami eyi ekyungo jo, oyam nken-tssai shita yicho. 1950 lona benkae ete kyon na nzyualo, nzyualo to ovo rankata yicho, osi sülami jo Naga jipo thanpoe jiang nzo tssoe Duncan yan tona Notun yan to tssoe vanta yicho.
Shi esüa, ete Lotha helo, helo na to yantsü shilo yithaka ha, jithüng jo jomi obüngi ethev tona ranbeni etsov jiang lo tae lum thetasi, ochyu ovüngi meta tsükarankata yiathüng tsükona lümbum eran ha mataroa, elani topvü lo jo, Potsow ekhumvü ji ochina ha mmyinga nchum n-vancho. Hojito vanta erowo jina, ete jipo na yantsü longi ekhümki kimüng tssolea, shishophen tssolea, mmhontsari n-lio ji yakchia oso lojo ete Lothatsü ebüpa chancheta. Elani ovung eli jiang yolo ekyongo jo, Christian ekyungo tssoa ha, oyani ekhümkho sisi yilea, ekhümkhi tssoe Potsow yantav ji tia lanka etssyuchi epi n-vanracho. 1957, November 29 lo ti, wopan ekhum to ndana, Eramo Rhanlamo ki na, Eramo Sanchisao, Eramo Nnyamo tona Eramo Kelekhri Angami to nzo tssoe benkae yitacho. Osi emong tsüngono khumphen ki jo, Naga Club ki (ehunga Naga Council lhishup) shilo school ki teriv lotsünga licho jilo na, Ao onte tara tona Angami tsükania to nzo tssoe khumta rocho.
1958, November 16th (Sunday) lojo, Ao jiang na onte voro rankata yio ji yakchia, onte poti ekhüm soyingi yiv tsükona okho jilo na chichoe yicho. Shijo ntio sana ngatheta licho tsükona mek, toleha yisanlan na ezüptao ji tsükona chitae yithukcho tae. Nzyu tara sülo jo, khümphen ki ji nkachile to ezo ji tsükona, 1962 October 21st lona benkae, enhünga Christian higher secondary ki lona khümta vancho. Ete Lotha ha ete poti chichoe yitao tvü khalia, jithüng jana ete Lotha yolo Potsow yi lona Lotha sokapenkae ochia nvamo ji tsükona, Ermo Kelhikhrie Angami ji choralo rangpyak Rs. 10/- pia pastor ejoina vanthukcho, osi ete Naga jipopoe tara vamo jiang ha sonhyae nzo khümta rocho.