Eloe Yangro (Women Department)

LBCD ELOE YANGRO

Ekhümkho Motsü (Church History) ephan Eloe Yangro ji 1967 lo benkae khita yicho, ovüngthüng jo ete kyon mataroa tai vamo ji tsükona Eloe Yangro ha Ekümkho benkadeni jo esopvüi nvam eloe eramvü ejomaiden na chungta eloe jiang sokabenkata khümta rotacho.

Nzyu 1970 loti Kümsüi Etssibeni na Eloe Esopvüi ovüngo ji 1977 nandang tssocho. Enio tojo, Eramvü Womoni Murry na Eloe Esopvüi elhi ji 1978-1987 nandang tssocho. Shi yuta lo Kümsüi Eramvü Ezano ji Eloe Esopvüi nzanchi ethüngchei 1977-1983 nandang tssocho.

Ethümo to jo, Shompvü Mmhonlumi na Eloe Esopvüi elhi ji 1988-2000 nandang tssocho.

Mezhüi to jo, Shompvü Meripeni Lotha na Eloe Esopvüi elhi ji 2001 - 2022 nandang tssocho. Shi yuta lo nzyu 2012 lona Shonpvüro Libeni Jami ji Eloe Esopvüi Nzanchi elhi lo sothei tssoa vanathüng 2025 April choro lona Eloe Esopvüi mongo to ji ompvüna tssoa vana.

Elani, 2025 August choro lona benkae Shonpvüro Nsungbeni Ezung ji Assoc. Eloe Esopvüi sothei elhi jiang elümoto mmhona tssota yia vana.

Ekhümkho benkadeni na Eloe Esopvüi shiang ephalo Eloe Yangro lo nzo lhitssoeden thungcherai ekhümkho osi yangro elhilan jiang bothe nli na elümoto mmhona tssota vana.

ELOE YANGRO ELHILAN

Mongsi nchük mezhüo tolo Eloe Ekhüm khita evamo jilo echümporo lhinsüng shiang khita vana.

• Nzyua akvü eloe ekhüm ovüngo jijo Eloe nzontsü na ekhang randan khia Potsow thüngi na sükhying mmha chona nzyu ji benkatala. Hoji esüa elani nzyu chiso loha eloe nzontsü Sector topvü lona ekhang randan khiala.
• Nzyu benkadeni ekhümkholo nonghoriden na khapheni n wothung tsokhying-tsoloden mmha randanka khitala.
• Opvüopo na nsochümo nonghoriden osi nkhyojüiden randani ekhüm khiala.
• Eloe Pensioners jiang randani ekhüm.
• Onoe tona tsokhying enghden randani ekhüm.
• Tsorapvüi na nsochümo enghden (emi) randani ekhüm kvüthüng sana jo emiden jiang lümbüm tssonia nkonjan ekhümkho jiang lo sosi owo ekhüm khitala.
• Eloe service lo evamo jiang randani ekhüm.
• Ekyimphi enghden randani ekhüm.
• Ete jipo jülo nchumche ekhüm.
• Ekhümkho lo ere elhi etssoe eloeden tona enghden randani ekhüm. 

Ekhümporo lhinsüng shianglo thephata Deaconess jiang okho chiroe nzyualo yenjoa onte khi ekhüm lhinsüng nsüngrüi thangshi pia khitala.

Elani Eloe yangro yakchia Lotha meta lo ekhümkho jiang yingsüng yingsüng na Eloe Esopvüiden osi Deaconess jiang Motsüza thangshi pita wotala. Eloe yangro na nzyu kvülo sana jo Eloe Nzontsü kümlan ha khitala. Elani Eloe jiang yidong olan olan khi Meshata (Seminar) osi okhe elhi, tssiyanmori lona Merangta ha khita vana.

• Thyutasanta – Eloe nzontsü thyutasanta (general meeting) jo nzyua akvü benkadeni khitala. Yangro lhitssoeden thyutanta jo tssüka ethev licho mek na nzyualo yanjo ethum khiala (benkae, nzyu, chiso, ochümi)

Enhunga Eloe yangro lo lhitssoeden Eloe Esopvüi, Associate Eloe Esopvüi, Eloe orang sekai elani Deaconessden osi Sotheiden (Ushers) to tssotsüi onte 75 na nzotssoe Potsow elhi jiang rüpaka elümoto mmhona tssota vana. 

Potsow Pvütsson Tssothoka!